පිරිතෙහි අන්තර්ගතය
ඒවං මේ සුතං ඒකං සමයං භගවා සාවත්ථීයං විහරති ජේතවනේ අනාථ පිණ්ඩිකස්ස ආරාමේ, අථ ඛෝ, අඤ්ඤතරා දේවතා අභික්කන්තාය රත්තියා අභික්කන්ත වණ්ණා කේවල කප්පං ජේතවනං ඕභාසෙත්වා යේන භගවා තේනුපසංකමිංසු. උපසංකමිත්වා භගවන්තං අභිවාදෙත්වා ඒකමන්තං අට්ඨාසි. ඒකමන්තං ඨිතා ඛෝ සා දේවතා භගවන්තං ගාථාය අජ්ඣභාසි.
බහූ දේවා මනුස්සා ච – මංගලානී අචින්තයුං
ආකංඛමානා සොත්ථානං – බ්රෑහි මංගල මුත්තමං
අසේවනා ච බාලානං – පණ්ඩිතානං ච සේවනා
පූජා ච පූජනීයානං – ඒතං මංගල මුත්තමං
පතිරූප දේස වාසෝ ච – පුබ්බේ ච කත පුඤ්ඤතා
අත්ත සම්මා පණීධි ච – ඒතං මංගල මුත්තමං
බාහු සච්චඤ් ච සිප්පඤ් ච – විනයෝ ච සුසික්ඛිතෝ
සුභාසිතා ච යා වාචා – ඒතං මංගල මුත්තමං
මාතාපිතූ උපට්ඨානං – පුත්තදාරස්ස සංගහෝ
අනාකුලා ච කම්මන්තා – ඒතං මංගල මුත්තමං
දානං ච ධම්මචරියා ච – ඤාතකානං ච සංගහෝ
අනවජ්ජානි කම්මානි – ඒතං මංගල මුත්තමං
ආරති විරති පාපා – මජ්ජපානා ච සඤ්ඤමෝ
අප්පමාදෝ ච ධම්මේසු – ඒතං මංගල මුත්තමං
ගාරවෝ ච නිවාතෝ ච – සනතුට්ඨි ච කතඤ්ඤුතා
කාලේන ධම්ම සවණං – ඒතං මංගල මුත්තමං
ඛන්තී ච සෝවචස්සතා – සමණානං ච දස්සනං
කාලේන ධම්ම සාකච්ඡා – ඒතං මංගල මුත්තමං
තපෝ ච බ්රහ්ම චරියං ච – අරියසච්චාන දස්සනං
නිබ්බාන සච්ඡිකිරියා ච – ඒතං මංගල මුත්තමං
ඵුට්ඨස්ස ලෝකධම්මේහී – චිත්තං යස්ස න කම්පති
අසෝකං විරජං ඛේමං – ඒතං මංගල මුත්තමං
ඒතාදිසානි කත්වාන – සබ්බත්ථ මපරාජිතා
සබ්බත්ථ සොත්ථිං ගච්ඡන්ති තං - තේසං මංගල මුත්තමන්ති.