පිරිතෙහි අන්තර්ගතය
පහූතභක්ඛො භවති - විප්පවුත්ථො සකාඝරා
බහු නං උපජීවන්ති - යො මිත්තානං න දූභති
යං යං ජනපදං යාතී - නිගමෙ රාජධානියො
සබ්බත්ථ පූජිතො හොති - යො මිත්තානං න දූභති
නාස්ස චොරා පසහන්ති - නාතිමඤ්ඤෙති ඛත්තියො
සබ්බෙ අමිත්තෙ තරති - යො මිත්තානං න දූභති
අක්කුද්ධො සඝරං එති - සභාය පටිනන්දිතො
ඤ‍ාතීනං උත්තමො හොති - යො මිත්තානං න දූභති
සක්කත්වා සක්කතො හොති - ගරු හොති සගාරවො
වණ්ණ කිත්ති භතො හොති - යො මිත්තානං න දූභති
පූජකො ලභතෙ පූජං - වන්දකො පටිවන්දනං
යසො කිත්තිං ච පප්පොති - යො මිත්තානං න දූභති
අග්ගි යථා පජ්ජලති - දෙවතා ව විරොචති
සිරියා අජහිතො හෝති - යො මිත්තානං න දූභති
ගාවො තස්ස පජායන්ති - ඛෙත්තෙ වුත්තං විරූහති
පුත්තානං ඵලමස්නාති - යො මිත්තානං න දූභති
දරිතො පබ්බතා තොවා - රුක්ඛාතො පතිතො නරො
චුතො පතිට්ඨං ලභති - යො මිත්තානං න දූභති
විරුළ්හමූල සන්තානාං - නිග්‍රොධමිව මාලුතො
අමිත්තා නප්පසහන්ති - යො මිත්තානං න දූභති